ستجد هنا كل ما تحتاج معرفته عن جامعة الخرطوم
معلومات عن جامعة الخرطوم:
*إسم الجامعة
جامعة الخرطوم
* ترتيبها على مستوى السودان
معروف طبعا انه الجامعة الاولى على مستوى السودان 🔥
* خاصة أم حكومية
جامعة حكومية
* متى تأسست
اتأسست الجامعة سنة 1956 بدمج كلية غردون التذكاربة مع مدرسة كتشنر للطب
* كلية اشتهرت بها الجامعة
واشتهرت الجامعة بكلية الطب اللي بنسميها الجميلة المستحيلة
* مقر الجامعة الرئيسي والفروع
السنتر بتاع الجامعة بشمل عدد من الكليات منها كلية الآداب
المجمع الطبي البتكون من كليات الطب والصيدلة وطب الاسنان موجود ف الخرطوم مربع 2 قريب من العربي وكلية التمريض ما بعيدة منهم واللي بتقع لصق مستشفى الشعب وبتفتح ف التعليمي بتاع الخرطوم تعليمي الاسنان
* أحد ابرز خريجي الجامعة
الشخصيات البارزة والخريجين من جامعة الخرطوم لا بقدر اعد ولا بقدر احصي بس منهم الطيب صالح 💙
* داخلية الجامعة (سكن الطلاب)
بالنسبة للسكن ف جامعة الخرطوم عندها داخليات لكل الكليات وغالبا بتكون قريبة للجامعة رسومها ما غالية خالص مثلا السنة دي 2022 الرسوم فيها كانت 20 الف ف السنة وبتكون متوفرة فيها الأسرة بالاخص لناس الولايات ليهم الاولوية حتى ناس العاصمة البعيدين من الجامعة
مثلا ناس تمريض داخلية البنات البركس بتبعد عن الجامعة شوية وبنحتاج نركب مواصلات وحدة وممكن تتمشي بالرجلين برضو
وباقي الكليات الطبية داخلية الزهراء اللي قريبة شديد من المجمع الطبي وبتتمشي بالرجلين بس
* المستشفى الجامعي والمعامل
من الجانب الصحي الجامعة عندها مستشفى
وده بيتعمل ليك فيه فحص شامل كامل قبل ما تسجل ف الجامعة الجامعة عندها مشرحة ف المجمع الطبي و معاملها ممتازة ومكتملة
* سمسترات ولا كورسات
نظام الدراسة سمسترات
* طريقة الامتحانات ومواعيدها
بين كل سمستر والتاني ماف اجازة طويلة لو الوضع استقر طبعا والامتحانات بتكون بعد كل سمستر وف بعض الكليات عندهم ميد تيرم
* مصادر المعلومات
القراية للامتحان بتكون من الشيتات البطلعها الدكتور وفي مكاتب ف الكليات فيها مراجع بتزيد منها المعلومات الشيتات بكونو متوفرين ف مكتبة الجامعة وبرسلوهم ليكم pdf ف قروب الدفعة
* الزي
غير موحد
* مباني الجامعة
مباني جامعة الخرطوم غالبا بتتكون من اكتر من طابق وبكون ف مسجد او استراحة والبيئة الفيها من البيئات الممتازة جدا شجر ومساحات خضراء وحاجة حلوة
* موقف الجامعة من الاعتماد العالمي
كلية الطب جامعة الخرطوم معتمدة عالميا 💙
* العلاقات الاجتماعية
العلاقة بين الطلاب علاقة مترابطة جدا جدا وكلهم بيفيدو ويستفيدو من بعض مجتمع متعاون ومتكاتف للحد الاخير 🤍
وكمان العلاقة مع الادارة موطدة ووثيقه
* الانشطة غير الأكاديمية
الأنشطة الغير اكاديمية ف الجامعة كتيرة منها الرحلات والبازارات والندوات
* المدينة التي تقع بها الجامعة
الخرطوم
عيوب جامعة الخرطوم:
انا شخصيا حتى الان ما واجهتني عقبة في الجامعة الحمد لله
مميزات جامعة الخرطوم:
والجامعة جميلة وبيئتها مشجعة للدراسة بشكل حلو جدا💙
* الموقع الإلكتروني الرسمي للجامعة (يحتوي الموقع على اللوائح وقوانين الجامعة، شعار الجامعة، كلياتها المختلفة، وارقام التواصل)
https://www.uofk.edu/ar
تعليقات
إرسال تعليق